Heradet har motteke meldingar om særs store mengder brunskogsniglar i privathagar og på fellesareal i området Grimo – Velure og på Nå. Sniglane gjer betydeleg skade på ei rekkje ulike plantar, og opplevast som særleg plagsame når store mengder ihjelkøyrde sniglar gjer det sleipt og klissete på gang- og sykkelvegar og luktar særs ubehageleg, eller når sniglar kryp inn i hus gjennom dører, vindauga og lufteluker og etterlet slimspor.

Brunskogsniglen kan bli opptil 15 cm lang og fargen er alltid einsfarga, men varierar frå lys orange til mørkebrun. Sjå foto her: http://www.bioforsk.no/ikbViewer/Content/52107/Iberiaskogsnegl_BFweb.jpg

Kryssingar mellom brunskogsnegl og svartskogsnegl førekjem, fargen er då tilnærma svart med raud saum. Denne vil oppføra seg som brunskogsniglen.

Landbrukskontoret har kontakta snigleekspert ved Bioforsk, som tilrår ”organisert” kamp mot sniglar. Det er viktig at fleire går saman om dette, t.d. grendalag, velforeiningar og sameiger. Lokalt samarbeid kan vera eit viktig middel for å lukkast. Alle oppmodast om å gjennomføra sniglebekjemping på eige område, samt ta i eit tak på fellesareal, langs gangvegar o.l. stader når ein ser sniglar. Moglege avfallshaugar og andre fellesområde med dårleg stell må lokaliserast. Det bør lagast planar for opprydding og framtidig stell av slike plassar, som ofte er viktige oppvekststader for sniglar. På fellesareal og langs gang- og sykkelstiar bør graset haldast heilt kortklipt. Det same gjeld graset i frukthagar.

Førebyggjande tiltak for å hindre spreiing av snigl er viktig. Sjekk plantane grundig ved kjøp. Hald all vegetasjon kortklipt, klipp opp 20-30 cm nedanfrå på buskar og hekkar. Fjern alle gøymestader, som store, opne kompostar, kvisthaugar, steinhaugar og steinmurar med mange gliper mellom steinane. Plukk egg under steinar o.l. i september-oktober. Unngå planteartar som sniglane føretrekk, som fløyelsblomar (Tagetes) og sommargeorginer. Set opp barrierar langs kanten av hagen. Barrierar kan kjøpast på Internett. Landbruksrådgivinga i Hordaland har utvikla ein barriere til bruk rundt jordbæråkrar.

”Nemaslug”, eit biologisk preparat som inneheld levande nematodar, er brukt av mange i kampen mot brunskogsniglane. Effekt føreset at det ikkje er for kaldt (under 6 grader) eller tørt, og forsøk ved Bioforsk har vist at Nemaslug berre er effektivt på små brunskogsneglar (opptil 1 cm lange). Ein får difor best effekt vår og haust, på varme dagar i mai og september, når dei fleste sniglane er små. Det er avgjerande at preparatet kjem i kontakt med sniglane. Preparatet sprøytast ut i dei områda det er mest sniglar. Klypp opp ein del sniglar, dynk dei i midlet og legg dei ut som åte for andre sniglar.

Nemaslug er no utseld hjå forhandlaren i Noreg, L.O.G. AS, slik at preparatet ikkje vil vere mogleg å kjøpa lenger i inneverande sesong når det som finst i butikkane no vert utseld. Det blir då berre preparat som inneheld jernfosfat som er aktuelt resten av året. Sniglemidlane CurEra Snegl, Ferramol, Killer Snegledreper’n, SmartBayt og Snegledreper kan kjøpast og brukast av alle, både hobbydyrkarar og yrkesdyrkarar. Yrkesdyrkarar kan bruke Sluxx, Ferraproff, Judge og Skipper. Bioforsk har fått gode resultat i forsøk med Sluxx.

Mengd plantevernmiddel ein må bruka er avhengig av kor mange sniglar ein har. Det er viktig å bruka nok middel for å få fullgod effekt. Sniglemiddel som Ferramol, SmartBayt og Nemaslug kan kjøpast inn i større kvanta for å få ein gunstigare pris.

Mange handplukkar mykje sniglar i hagen sin om sommaren. Dette kan redusera populasjonen med opptil 75 %, men er særs tidkrevjande. Sniglane er lettast å finna frå omkring klokka 23 om kvelden, særleg når det er godt og vått på bakken. Hovudlykt, pølseklype eller eingangshanskar er ideelt å bruke under plukkingen, og samle sniglane i ei bøtte for seinare avliving. Les om korleis du bør avlive snegler.

Du kan auka utfangsten av sniglar mykje ved bruk av ulike typar feller.

Døde sniglar kan ein grava ned i hagen eller kasta på komposten.

På Bioforsk sine heimesider finn du mykje informasjon om sniglar som skadedyr. Det er utarbeidd ei Ti på topp-liste: Superråda for å bli kvitt brunskogsniglane:

http://www.bioforsk.no/ikbViewer/page/forside/nyhet?p_document_id=98503

Handlingsplan for bekjempelse av iberiaskogsnegl (2008): http://www.bioforsk.no/ikbViewer/Content/42823/Handlingsplan_iberia.pdf